Türkiyənin cənub-şərqindəki Şanlıurfa vilayətindəki Göbeklitəpə məbəd kompleksini 2019-cu ildə rəsmi açılışından bəri 3,5 milyondan çox yerli və xarici turist ziyarət edib.
AZƏRTAC xəbər verir ki, təkcə bu ilin əvvəlindən dünyanın ən qədim tikililərindən biri olan, yaşı 12 min il olan abidəni ziyarət edənlərin sayı 65 min nəfərə çatıb.
Türkiyə vilayətinin rəsmiləri arxeoloji qazıntıların davam etdiyi məşhur meqalitə marağın artdığını bildiriblər.
2018-ci ilin iyul ayında türkcə “Qarınlı təpə” mənasını verən Göbeklitəpə kompleksi UNESCO-nun Dünya İrs Siyahısına daxil edilib, 2019-cu ilin martında isə Prezident Rəcəb Tayyib Ərdoğanın iştirakı ilə rəsmi açılışı olub.
Dövlət başçısının qərarı ilə 2019-cu il Türkiyədə “Göbeklitəpə İli” elan edilib.
