Kimyəvi saç düzləşdirmənin təhlükələri ortaya çıxıb

Tərkibində qlioksilik turşu olan kimyəvi saç düzləşdirici məhsullardan istifadə böyrəklərə zərər verə bilər.

Bu barədə Merilend Universitetindən doktor Coşua Devid Kinq bildirib.

Həkim bildirib ki, qlioksilik turşu ilə kimyəvi saç düzləşdirici krem ​​əvvəllər səhhətində heç bir problemi olmayan 26 yaşlı tunisli qadının böyrəyinə ziyan vurub. Məlumdur ki, qadın 2020-ci ilin iyununda, 2021-ci ilin aprelində və 2022-ci ilin iyulunda uzunmüddətli saç düzləşdirmə prosedurları üçün gözəllik salonuna baş çəkib.

Hər dəfə o, qusma, ishal, qızdırma və bel ağrısı ilə qarşılaşıb. Həmçinin, düzəldici məhsuldan istifadə onun baş dərisində xoralar əmələ gətirib. Sonradan həkimlər xəstənin qanında kreatinin səviyyəsinin yüksəldiyini və bunun böyrək çatışmazlığının əlaməti olduğunu aşkar ediblər.

Uzunmüddətli saç düzləşdirən və hamarlaşdıran məhsullar insanın saçının quruluşuna təsir edərək, onları qıvrılmaya daha az meylli edir. Adətən, saça düzləşdirici məhlul tətbiq olunur və sonra ütü və ya fen vasitəsilə qurudulur.

Kinq qlioksilik turşunun əsas kimyəvi maddə olan formaldehidə potensial olaraq daha az zəhərli alternativ kimi saç düzləşdirici məhsullarda istifadə olunmağa başladığını bildirib. Bəzi tədqiqatlar qlioksilik turşunun da təhlükəli olduğunu göstərdi. Baş dərisinə sürtüldükdə bədənə sürətlə sorulduğu üçün böyrəklərə zərər vermə ehtimalı yüksəkdir.

Məndə: Gazeta.ru