Şəkil çəkdirmək istəyən turist vulkanın kraterinə düşüb

İndoneziyada məşhur "mavi alov" fenomeni ilə tanınan vulkanda şəkil çəkdirən çinli qadın kraterin kənarından yıxılaraq ölüb.
Hafta.az-ın yazdığına görə, hadisə baş verən zaman 31 yaşlı Huang Lihong və həyat yoldaşı Zhang Yong Şərqi Yava əyalətində bələdçi turunda olublar. “Hongxing News”un məlumatına görə, ikili günəşin doğuşunu izləmək üçün bölgədəki vulkan turizm parkı olan İjen kraterinin kənarına çıxıblar.
Polisin məlumatına görə, 75 metr hündürlükdən yıxılan qadın zərbədən dünyasını dəyişib. Polis əməkdaşları ölümün bədbəxt hadisə kimi qeydə alındığını bildiriblər.
Tur bələdçisi qadın fotoşəkil çəkdirərkən əvvəlcə uçurumun kənarından iki-üç metr aralıda dayanaraq təhlükəsiz məsafə saxladığını söyləyib. Bələdçi əlavə edib ki, o, cütlüyə təhlükəli yerlər barədə xəbərdarlıq edib. Buna baxmayaraq, Lihong ağacın yanında şəkil çəkdirmək üçün geriyə hərəkət etməyə başlayıb. Lihongun yaxınlaşmasının səbəbi çılpaq və səpələnmiş budaqları fon kimi istifadə etmək idi.
Məlumata görə, Lihong arxaya doğru gedərkən təsadüfən uzun paltarının ətəyinə basıb və özünü saxlaya bilməyərək uçurumdan yıxılıb.
İjen vulkanı kükürdlü qazların yanması nəticəsində yayılan mavi işığın səbəb olduğu “mavi alov”u ilə tanınır. 2018-ci ildə vulkan zəhərli qazlar buraxmağa başlayandan sonra bir çox insan evlərini tərk etməli olub və ən azı 30 nəfər xəstəxanaya yerləşdirilib.
İjen vulkanı müntəzəm olaraq az miqdarda zəhərli qazlar buraxsa da, ərazi ictimaiyyət üçün açıq qalır.
İndoneziyada təxminən 130 aktiv vulkan var. Milyonlarla indoneziyalı münbit kənd təsərrüfatı torpaqlarına görə əsasən vulkanların yaxınlığında yaşayır və işləyir.