BMT UNRWA-nın HƏMAS-la əlaqədə şübhəli bilinən 19 əməkdaşının işini yoxlayır

BMT-nin Daxili Nəzarət Xidmətləri İdarəsi təşkilatın Fələstinli Qaçqınlara Yardım və İşlərin Təşkili üzrə Agentliyinin (UNRWA) Fələstinin radikal HƏMAS hərəkatı ilə əlaqədə şübhəli bilinən 19 əməkdaşının fəaliyyətini yoxlayır.

“Report” xəbər verir ki, bu barədə brifinqdə BMT Baş katibinin rəsmi nümayəndəsi Stefan Dujarrik bildirib.

"Daxili Nəzarət Xidmətləri İdarəsi Fələstinli Qaçqınlara Yardım və İşlərin Təşkili üzrə Agentliyinin 19 əməkdaşı ilə bağlı araşdırma aparır – 12 nəfər barədə bizə yanvarda məlumat verildi, UNRWA ilə müqavilələr pozuldu və daha sonra 7 nəfər barədə məlumat aldıq", - o deyib.

Onun sözlərinə görə, İsrail hakimiyyətinin HƏMAS ilə əlaqədə günahlandırdığı 12 işçidən 8-i ilə bağlı istintaq davam edir, bir iş bağlandı və UNRWA-nın daha 3 işçisinin işinin yoxlanılması İsrail səlahiyyətlilərinin ittihamlarını dəstəkləmək üçün verdiyi dəlillərin az olması səbəbindən dayandırıldı.

Dujarrik əlavə edib ki, Daxili Nəzarət Xidmətləri İdarəsinin müstəntiqləri əvvəllər İsrail hakimiyyəti ilə istintaqı müzakirə etmək üçün bu ölkəyə səfər ediblər, onların may ayında yenidən həmin ölkəyə səfəri gözlənilir.