Ermənistanın baş naziri Nikol Paşinyan bir neçə gün öncə Azərbaycanla sərhəddə gələrək ilk mesajını verdi. “Sizin yaşadığınız bu kəndlər Azərbaycana məxsusdur, bu əraziləri tərk etməlisiniz” – Paşinyan bu fikirləri işğal altında olan Azərbaycan kəndlərində keçirtdiyi görüş zamanı bildirdi.
Bunun ardınca İrəvanda Paşinyana qarşı çıxan qüvvələr onu xəyanətdə ittiham etmədi. Paşinyanın cavabı da özünü çox gözlətmədi. Paşinyan bildirdi ki, Qarabağ separatçılarının İrəvandakı “nümayəndəlik” binası və orada toplaşanlar Ermənistan üçün əlavə gərginlik mənbəyidir. Separatçıların keçmiş lideri Samvel Şahramanyan Fransa nəşrinə müsahibəsində deyib ki, onlar İrəvanda fəaliyyətlərinin davam etdirirlər. Halbuki, Qarabağdan qaçmağa hazırlaşarkən “dövlət strukturlarını” buraxdığını elan etmişdi. Samvel Şahramanyanın yeni açıqlaması baş nazir Nikol Paşinyana meydan sulamaqdır. Nikol Paşinyan ona görə deyib ki, Ermənistanda yalnız bir hökumət və bir iqtidar ola bilər. Məntiqlə Paşinyan həmin “nümayəndəliyin” fəaliyyətini qanundakənar elan edib həmin binanı separatçıların əlindən almalıdır. Ancaq o bunu etmir. Paşinyan hər məsələdə olduğu kimi bu məsələnin həlini də gecikdirir. Həmin binada toplaşanlar Paşinyana müxalif mövqedədirlər və istənilən daxili və xarici gücün hökumətə qarşı planlarında yer alacaqlar. Həmin binada toplaşanlar eyni zamanda iki ölkə arasında sülh prosesinə də əngəldirlər.
Paşinyan sülh cağrışlarına rəğmən bəzi ermənilər öz təxribatçı addımlarını davam etdirirlər. Bir neçə gün öncə məhz ermənilərin təxribatçı dəstəsi İrəvanda həbs edildi. Bu gün isə Ermənistanın keçmiş müdafiə naziri, parlamentdə “Ermənistan” fraksiyasından deputat olan Xocalı qatili Seyran Ohanyan Qazaxın işğal altında qalan kəndlərinə gəlib.
Ohanyanla birlikdə “Ermənistan” fraksiyasının digər deputatları da Azərbaycan kəndlərində olub.
Bağanis Ayrım və Əskipara kəndlərində məskunlaşan ermənilərlə görüşən Ohanyan onları müqavimət göstərməyə çağırıb. Bildirib ki, Ermənistan hakimiyyəti 4 kəndi Azərbaycana qaytarmaq istəsə də, müqavimət göstərməklə bunun qarşısını ala bilərlər.
Ohanyan daha əvvəl bu kəndlərdə yerləşən erməni ordusunun birləşmələrini hakimiyyətə qarşı mübarizəyə və Azərbaycanla müharibə aparmağa çağırmışdı. Azərbaycan kəndlərinə gələn Ohanyanın buradakı hərbçilərlə görüşdüyü, kəndlər qaytarıldığı zaman onları müqavimət göstərməyə sövq etdiyi istisna edilmir.
Bir sözlə Paşinyan indi bir güllə ilə özünün iki rəqibini sıradan çıxara bilər. Bunlardan biri Samvel Şahramanyan, digəri isə Seyran Ohanyandır.
Paşinyan öz mövqeyini möhkəmləndirmək üçün çətin sınaqdan üzüağ çıxmalıdır. Çünki daha bir gərginlik Ermənistanı üçuruma apara bilər. Paşinyan da bunu anlayır və buna görə hərəkət edir.
Qoşqar Salmanlı
.png)
.jpg)