Renat Dadaşovun komandası yenə qələbəyə həsrət qaldı

Futbol üzrə Azərbaycan milli komandasının hücumçusu Renat Dadaşovun formasını geyindiyi “Hatayspor” növbəti matçına çıxıb.

Arena.az xəbər verir ki, futbolçumuzun komandası bu gün Türkiyə Super Liqasının 35-ci turu çərçivəsində “Qaziantep”lə qarşılaşıb.

“Hatayspor” bu rəqiblə səfərdə baş tutan oyundan heç-heçə ilə ayrılıb – 1:1. 11-ci dəqiqədə məğlub duruma düşən hataylılar cəmi 4 dəqiqə sonra bərabərlik qoluna imza atıblar. Qalan dəqiqələrdə bu hesab dəyişməz qalıb.

Dadaşov bu oyunun iştirakçısı olmayıb. Cari mövsümdə 5 qol vurmuş millimizin hücumçusu bu dəfə sonadək ehtiyatda qalıb.

“Hatayspor” 35 turdan sonra 34 xalla 20 kollektiv arasında 18-ci pillədə qərarlaşıb. Komanda keçirdiyi 35 oyunda 7 qələbə qazanıb, 13 heç-heçə edib, 15 məğlubiyyətə üzülüb.

Xatırladaq ki, Renat Dadaşov müqavilə ilə 2022-ci ilin iyul ayından formasını geyindiyi İsveçrənin “Qrasshopper” klubuna məxsusdur. Türkiyə klubu onu bu mövsümün sonuna kimi satınalma şərti ilə icarəyə götürüb. Dadaşov Hatay təmsilçisində 29 oyun keçirib və 5 qol vurub.