Futbol üzrə Azərbaycan milli komandasının mərkəz müdafiəçisi Rahil Məmmədov Polşanın “Radomyak” klubunda növbəti matçına çıxıb.
Arena.az xəbər verir ki, Polşa Ekstraklasasında 2024/2025-ci illər mövsümünün 21-ci turunun oyunları keçirilib.
Rahilin komandası səfərdə “Qornik”lə qarşılaşıb. Beş qolun qeydə alındığı oyun “Radomyak”ın məğlubiyyəti ilə yekunlaşıb – 2:3. Rahil bu oyuna start heyətdə başlayıb və sonadək oynayıb.
“Radomyak” 21 turdan sonra topladığı 21 xalla 18 iştirakçı arasında 15-ci pillədə qərarlaşıb. Məmmədovun komandası 21 oyunda 6 qələbə qazanıb, 3 heç-heçə edib, 12 məğlubiyyətə üzülüb.
Xatırladaq ki, 2024-cü ilin yayında Polşanın digər klubu LKS-dən (Lodz) azad agent kimi ayrılmış 28 yaşlı futbolçu yüksək liqa təmsilçisi “Radomyak”la 2 illik müqaviləyə imza atıb. O, bu komandanın heyətində indiyə qədər 14 oyuna çıxıb.
Rahil Məmmədov daha öncə ölkəmizdə “Qarabağ”, “Neftçi”, “Səbail” və “Zirə”nin də formasını geyinib. 28 yaşlı müdafiəçi 2018-ci ilin mart ayında debüt etdiyi Azərbaycan milli komandasının heyətində 21 oyuna çıxıb.
