1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Bakı şəhəri, Yasamal rayonunda narkomanlar bina sakinlərinin haqlı narahatlığına səbəb olur.
Oxu.Az xəbər verir ki, Cəfər Cabbarlı küçəsi, 8 ünvanında yerləşən binanın sakinləri narkotikdən istifadə edən bir gəncin xeyli vaxtdır ki, binanın blokunda məskunlaşdığını qeyd ediblər.
Bina sakinlərinin sözlərinə görə, bu gənc blokda gecələməkdən əlavə, həm də təbii ehtiyaclarını blokda ödəyir.
"Buna bir tədbir görülməlidir. Hər gün uşaqlarımız dərsə gedir, dərsdən gəlir. Hər dəqiqə uşağın yanında olmaq mümkün deyil", - deyə bina sakini bildirib.
Məsələ ilə bağlı Oxu.Az-ın sorğusunu cavablandıran Daxili İşlər Nazirliyinin (DİN) Mətbuat Xidmətinin baş inspektoru, polis leytenantı Lumu İsrəfilli bildirib ki, dilənçilik, tüfeyli həyat tərzi sürən şəxslərin profilaktikası polis orqanları tərəfindən daim diqqət mərkəzində saxlanılır.
"Dayanacaqlarda, park və xiyabanlarda, insanların sıx toplaşdığı digər ictimai yerlərdə dilənçilik, tüfeyli həyat tərzi sürən şəxslərlə profilaktik iş aparılır. Bununla yanaşı, aidiyyəti dövlət qurumları ilə birgə onların müvafiq sığınacaqlara yerləşdirilməsi təmin olunur.
Qeyd olunan görüntülərlə bağlı polis əməkdaşları tərəfindən araşdırma aparılır. Tüfeyli həyat tərzi keçirən şəxs barəsində ərazi üzrə polis əməkdaşları tərəfindən lazımi tədbirlər görülür", - deyə DİN rəsmisi vurğulayıb.
Əzizə İsmayılova
