Kreml Rusiya prezidenti Vladimir Putinlə Amerika lideri Donald Tramp arasında gözlənilən söhbətin təfərrüatlarını əvvəlcədən açıqlamayacaq.
Modern.az xəbər verir ki, bunu Rusiya dövlət başçısının mətbuat katibi Dmitri Peskov brifinqdə bildirib.
“Biz heç vaxt bunu etmirik, heç vaxt özümüzdən irəli getmirik. Amma bizim anlayışımıza görə, təbii ki, iki prezidentin söhbətləri məzmunun hər hansı apriori müzakirəsinə məruz qalmır. Buna görə də biz bunu etməyəcəyik", - Kreml sözçüsü brifinqdə deyib.
TASS-ın sualını cavablandıran Peskov təsdiqləyib ki, Putinlə Tramp arasında söhbət martın 18-i çərşənbə axşamına hazırlanır.
ABŞ prezidenti ötən gün jurnalistlərə bildirib ki, çərşənbə axşamı Rusiya lideri ilə danışmağı planlaşdırır və söhbət zamanı Ukrayna münaqişəsi çərçivəsində ərazi və infrastruktur məsələlərinə xüsusi diqqət yetirmək niyyətindədir.
