Süni intellektin gələcəyi uğrunda mübarizə həm maliyyə, həm də şəxsi səviyyədə ciddi gərginliyə çevrilib.
Valyuta.Az xəbər verir ki, "OpenAI" şirkətinin baş direktoru Sam Altman, süni intellekt sahəsindəki rəqibi Elon Maskın təklif etdiyi böyük müqaviləni rədd etdikdən bir gün sonra ona qarşı açıqlamalar verib. O, Maskın rəhbərlik etdiyi investor qrupuna bildirib ki, "ChatGPT"nin yaradıcısı olan "OpenAI" satılmayacaq – hətta şirkət üçün iri məbləğdə təklif gəlsə belə.
"İlon uzun müddətdir müxtəlif şeylər sınayır. Bu da onun ən son addımıdır – bilirsiniz, bu həftənin yeni epizodu," – Altman Parisdə keçirilən Süni İntellekt Sammitində "Bloomberg TV"yə müsahibəsində deyib. "Düşünürəm ki, o, sadəcə bizi ləngitmək istəyir."
Mask "OpenAI"nin həmtəsisçilərindən biri olsa da, sonradan şirkətdən ayrılıb. O, uzun müddətdir Altmanla mübahisə edir və "OpenAI"yə qarşı bir neçə hüquqi iddia qaldırıb. Mask iddia edir ki, şirkət və onun rəhbərliyi "OpenAI"ni xeyriyyə təşkilatı kimi səhv təqdim edib.
"OpenAI" qeyri-kommersiya təşkilatı tərəfindən idarə olunur və onun tərkibində "OpenAI LP" adlı mənfəət yönümlü bir qurum mövcuddur. Bu kommersiya şirkəti "OpenAI"ni bir neçə il ərzində faktiki olaraq dəyərsiz vəziyyətdən 100 milyard dollarlıq qiymətləndirməyə qədər yüksəldib. Bu uğurun əsas səbəbkarı isə məhz Altman hesab edilir.
Maskın fikrincə, "OpenAI" mənfəət əldə etməyə yönəlməklə öz təsis sənədindəki prinsiplərdən uzaqlaşıb.
Hazırda Mask süni intellekt sahəsində "x.AI" adlı öz şirkətini quraraq "OpenAI"yə rəqib olub.
"Mən istərdim ki, o, daha yaxşı məhsul yaratmaqla rəqabət aparsın, amma görünür, burada başqa taktikalar var," – Altman bildirib. "Çoxlu məhkəmə iddiaları, müxtəlif absurd addımlar, indi isə bu. Biz isə sadəcə başımızı aşağı salıb işimizə davam edəcəyik."
Maskın "OpenAI"yə qarşı strategiyasını qeyri-müəyyənlik və qorxu üzərində qurub-qurmadığı ilə bağlı suala cavab verən Altman onun öz rəqibini lağa qoyaraq razılaşıb.
"Ola bilsin ki, onun bütün həyatı qeyri-müəyyənlik üzərində qurulub. Ona görə narahatam," – deyə Altman bildirib. "Düşünmürəm ki, o, xoşbəxt insandır. Ona görə həqiqətən narahatlıq hissi keçirirəm."
Mask və "X" platformasının nümayəndələri məsələyə şərh verməkdən imtina ediblər.
Altman bildirib ki, Maskın ABŞ prezidenti Donald Trampın administrasiyasında daha yüksək mövqeyə sahib olması onu narahat etmir, baxmayaraq ki, bu barədə düşünməli olduğunu etiraf edib.
"Bəlkə də narahat olmalıyam, amma elə də yox," – deyə Altman vurğulayıb. "Mən sadəcə hər səhər oyandığımda texnologiyamızı necə daha da inkişaf etdirəcəyimizi düşünmək istəyirəm."
Mask və Altman arasındakı qarşıdurma
Mask ilk dəfə 2024-cü ilin iyununda "OpenAI"ni məhkəməyə verib, lakin şirkət "OpenAI"nin ilk illərinə aid Maskın bir neçə e-poçtunu dərc etdikdən sonra iddiasından geri çəkilib. Həmin e-poçtlarda Mask, süni intellekt layihəsinin maliyyələşdirilməsi üçün böyük gəlirlərə ehtiyac olduğunu qəbul edirdi. Bu isə onun "OpenAI"nin mənfəət məqsədi güdməsinə qarşı irəli sürdüyü iddialarla ziddiyyət təşkil edirdi.
Mask 2024-cü ilin avqustunda yeni bir məhkəmə iddiası qaldıraraq "OpenAI"ni süni intellekt sahəsində daha güclü "süni ümumi intellekt" texnologiyası inkişaf etdirməklə maksimum mənfəət əldə etməyə çalışmaqda ittiham edib. O, şirkəti həmçinin dələduzluqda günahlandırıb.
Digər tərəfdən, "OpenAI" iddia edir ki, Mask sadəcə şirkətdəki mövqeyini itirdiyi üçün qısqanclıq hissi keçirir. Xatırladaq ki, Mask 2018-ci ildə "Tesla"nın "OpenAI"ni almasını təklif etdikdən sonra şirkətdən ayrılmışdı.
Altman isə Maskın "OpenAI"nin qeyri-kommersiya əsaslarını tərk etdiyinə dair fikirlərini rədd edir. Şirkətin mənfəət yönümlü qurumunu ayırmaq üzərində işlədiyini təsdiqləsə də, bunun təşkilatın missiyasını dəyişməyəcəyini bildirib.
"Biz tamamilə mənfəət yönümlü modelə keçmirik," – Altman vurğulayıb. "Əslində, ümumiyyətlə belə bir addım atacağımıza əmin deyilik. Lakin nə baş verməsindən asılı olmayaraq, qeyri-kommersiya qurumu kritik əhəmiyyət daşımağa davam edəcək, missiyanı irəli aparacaq. İdarə heyəti yeni dövr üçün ən yaxşı strukturun nə ola biləcəyini araşdırır, lakin qeyri-kommersiya hissəsi heç yerə getmir."
Bununla belə, Mask və onun investorlarının təklif etdiyi təxminən 100 milyard dollarlıq təklif "OpenAI"nin gələcək planlarını çətinləşdirə bilər. Mənfəət yönümlü bölməni ayırmaq üçün qeyri-kommersiya qurumu böyük ehtimalla müəyyən bir pay saxlamalı və müqavilənin dəyərini müəyyən etməlidir.
Əgər Maskın təklifi realdırsa, "OpenAI" üçün daha sərfəli bir variant təqdim etmək zərurəti yarana bilər. Başqa sözlə, Mask artıq şirkətin qiymətinin 97,4 milyard dollardan aşağı olmayacağını müəyyən edib.
Lakin məsələ bu qədər sadə deyil. "OpenAI" qeyri-kommersiya təşkilatı olduğu üçün onun sərmayəçilərin gəlirini maksimuma çatdırmaq kimi öhdəliyi yoxdur. Şirkət, həmçinin iddia edə bilər ki, Maskın təklifi onun təhlükəsizlik prinsiplərinə ziddir.
Hər halda, süni intellekt dünyasının ən nüfuzlu şirkəti bundan sonra daha mürəkkəb və çətin bir yolla irəliləməli olacaq.
Rəhim
