“Uşağınız üçün etdiklərinizi uşağın başına qaxınc etməyin“- Psixoloq

"Pis valideyn uşağını döyən, söyən, təhqir edən valideyn deyil, Bu beş davranışdan birini edirlərsə də, heç yaxşı valideyn olmurlar.

Psixoloq Aydan İsgəndərzadə bunu News365.az-a müsahibəsində deyib. O, valideynlərin uşaqlarla necə rəftar etməli olduqlarını və hansı davranışları etməməli olduqları haqqında danışıb: 

1. Uşağınızı duyqusal manipulyasiya etməyin: Mən səndən küsdüm; mən sənin anan olmayacam;  sən dərslərini oxumursan demək ki, məni sevmirsən; mən öləcəm; anasız, atasız qalacaqsan; evdən gedəcəm kimi  sözlər deyərək uşağınızın daxili dünyasını məhv etmiş olursunuz.  Çünki, o sadəcə mən yaxşı uşaq olarsam məni sevəcəklər, mən pis olduğum anda məni tərk edəcəklər deyə düşüncə formalaşacaq. Sabah da bir şəxsiyyət olaraq formalaşdığında bu düşüncə və duyğu ilə hərəkət edəcək, heç kimə sözünü deyə bilməyəcək.

2. Uşağınızın duyğularını görməzdən gəlməyin: Yerə düşən zaman uşağınız ağlayanda əşi heçnə olmadı, keçdi getdi, yekə kişisən ağlamazlar; əşi burda nə var ki, belə hirslənirsən, şarı partlayan uşağa: əşi narahat olma təzəsin alacayıqdeyə uşağın o an duyğusunu göməzdən gəlirsiniz, uşağın o anda yaşadığı hissləri, nə olduğunu qavramasına mane olursunuz, sonra mənfi situasiyalarda nə hiss etdiyini bilmədiyi üçün necə davranacağını da bilməyəcək. Öz duyğularını, başqa insanın duyğusunu görməzdən gəlməyə başlayacaq.

3. Uşağınız üçün etdiklərinizi uşağın başına qaxınc etməyin: Sənə görə saçımı süpürgə elədim, yemədim yedirtdim, içmədim içirtdim deyən valideynlər də var. Bu sizin valideynlik borcunuzdur və hətta buna borc kimi vaxmayın, məsuliyyət kimi baxın.

4. Ər- arvad münasibətlərinizə uşağı daxil etmək olmaz, sözünüzü uşaq vasitəsilə deməyin: Get atana denən ki, get anana denən ki, sənin anan belə elədi, sənin atan belə elədi deyə başlayan bütün cümlələr səhv cümlələrdir. Uşsğı aranızda qoymayın. 

5. Pis valideynlik nümunəsi uşağının nə yaşadığı ilə bağlı heç bir xəbəri olmayan valideyndir. Neçənci sinifə gedir, nələri sevir, nələri sevmir, nələrdən qorxur, nələrdən zövq alır, nələrdən nifrət edir, məktəbdə nə kimi problemlər yaşayır, son vaxtlar kimlərlə dostluq edir bu kimi detallardan məlumatsız olan atalar var, hətta bir çox analar var. Uşaqlarınızla zaman keçirin, uşağınıza sadəcə bu gün neçə aldın, dərslərin necə gedir deyə maraqlanmayın, nələrlə məşqul olursan, nələri sevirsən deyə də soruşun"- deyə bildirib. 

Vəfa Vəliyeva, News365.az