Vitold Zqlenitski ilə bağlı kitab təqdim olunub

Azərbaycanın neft və qaz sektorunda böyük xidmətləri olan polşalı mühəndis, görkəmli ixtiraçı, geoloq və xeyriyyəçi Vitold Zqlenitski ilə bağlı kitab çap olunub.

525.az xəbər verir ki, Polşanın ölkəmizdəki səfirliyi kitabın təqdimat mərasimini keçirib.
Tədbirdə çıxış edən Polşa səfirinin müavini Mixal Qreçilo deyib ki, Azərbaycanın qaz və neft sektorunda əhəmiyyətli kəşflərinə baxmayaraq Vitold Zqlenitski ölkədə az tanınır. Bu kitabın çapında məqsəd onun fəaliyyəti və töhfələri barədə Azərbaycan ictimaiyyətini məlumatlandırmaqdır. Diplomat qeyd edib ki, kitab iki dildə - Azərbaycan və İngilis dillərində nəşr olunub.

“Bu kitab bir neçə il əvvəl Polşada professor Anceey Xodubski tərəfindən yazılıb.   Kitabı təqdim etməkdə məqsədimiz  Azərbaycandilli və ingilisdilli oxucuların geoloq və ixtiraçının fəaliyyəti ilə daha yaxından tanış olmasına şərait yaratmaqdır. Buna görə də səfirlik kitabı iki dildə nəşr etməyi qərara alıb. Bu kitabın Azərbaycandilli versiyasının təbliği ilə bağlı tədbir bu ilin fevralında baş tutub və Milli Azərbaycan Tarixi Muzeyi ilə birgə təşkil olunub”, - Qreçilo deyib. 

Daha sonra sosiologiya üzrə ictimai elmlər doktoru Samir Səttarov polşalı alim haqqında təqdimatla çıxış edərək onun neft və qaz sektoruna verdiyi töhfələr barədə danışıb.

Qeyd edək ki, Vitold Zqlenitski 1850-ci ildə Polşada anadan olub.  Polşada, daha sonra isə Riqada çalışdıqdan sonra 1891-ci ildə Bakıya köcüb və ömrünün sonuna qədər burada yaşayıb.

Qeyd edək ki, o dövrdə Zqlenitskinin təşəbbüsü ilə Bakıda su kanalının tikintisinə başlanılıb, həmçinin alim neftin çıxarılması üsullarının modernləşdirilməsi ilə məşğul olub. Təkcə qazma platforması konsepsiyasını deyil, həm də qazma işini asanlaşdırmaq üçün bir sıra ixtiralar, məsələn, neft quyularının əyriliyini ölçmək üçün cihaz və valları daha sürətli və daha böyük dərinliklərə qazmağa imkan verən texniki həllər hazırlayıb.

Cənab Zqlenitski, həmçinin elmin inkişafını da dəstəkləyirdi. O, Bakıdakı Rus Texniki Cəmiyyyətin kitabxanasına maddi yardım göstərib.
V.Zqlenitski bir cox elmi əsərlərin və geologiya sahəsində (həmcinin Qafqazda neft mədənləri barədə) nəşrlərin də müəllifıdir.

V.Zqlenitski 1904-cü ildə 54 yaşında ağır formalı şəkərli diabet xəstəliyindən vəfat edib, o, Polşada dəfn olunub.

Məşhur alim Zqlenitski ölümündən əvvəl, bütün var-dövlətinin elmin və maarifın inkişafına sərf olunmasını vəsiyyət edib. Bu təmənnasız vəsiyyətinə görə, Vitold Zqlenitski "Polşalı Nobel" adı alıb.

1963-cü ildə Polşanın Plotsk şəhərində neft emalı zavodundan şəhərin mərkəzinə doğru gedən küçəyə Vitold Zqlenitskinin adı verilib. Onun haqqında 1973-cü ildə rejissor Riçard Badovski "Qafqaz bioqrafiyası", 1988-ci ildə rejissor Vladislav Vasilevski "Vitold Zqlenitski və digərləri", 2008-ci ildə isə resjissor Adam Roqala "Polşalı Nobel" filmini çəkiblər.



Pərvanə






















Bizi İnstagramda izləyin