Futbol üzrə Azərbaycan millisinin yarımmüdafiəçisi Ozan Can Kökçü Finlandiyanın HJK komandasının heyətində növbəti matçına çıxıb.
Arena.az xəbər verir ki, 25 yaşlı futbolçunun komandası Finlandiya çempionatının 26-cı turu çərçivəsində “Haka” ilə üz-üzə gəlib.
Helsinki klubu doğma meydanda baş tutan bu oyundan 0:1 hesablı məğlubiyyətlə ayrılıb.
Ozan bu görüşə start heyətdə başlayıb və 64-cü dəqiqədə əvəzlənib.
Qeyd edək ki, bu, Ozanın Finlandiya çempionatındakı 7-ci oyunu olub. O, bu görüşlərdə hələlik 1 assistlə fərqlənə bilib.
Son 4 oyununda qələbəyə həsrət qalan, ardıcıl ikinci məğlubiyyətinə üzülən HJK 26 turdan sonra topladığı 45 xalla “çempionluq qrupu”nun” 3-cü pilləsində qərarlaşıb. “Haka” isə 38 xalla 5-cidir. Helsinki təmsilçisi “İlves” (51 xal) və “KuPS”-dən (53 xal) geri qalır.
Son iki mövsümü Niderlandın “Eyndhoven” klubunda keçirmiş Ozan Can Kökçü bu il iyulun 31-də HJK ilə 2,5 illik müqaviləyə imza atıb. O, bu klubun heyətində 12 oyun keçirib, 1 məhsuldar ötürmə edib.
Ozan daha öncə Niderlandda “Eyndhoven”, “Valveyk” və “Telstar”ın, Türkiyədə “Bursaspor” və “Girəsunspor”un, Azərbaycanda “Sabah”ın da uğurları üçün çalışıb. Azərbaycanın U-20 və U-21 yığmalarının formasını geyinmiş futbolçu 2022-ci ildən əsas millimizə dəvət alır. O, Azərbaycan milli komandasının heyətində 9 oyuna çıxıb, 2 məhsuldar ötürmə müəllifi olub.
