Futbol üzrə Azərbaycan millisinin yarımmüdafiəçisi Ozan Can Kökçü Finlandiyanın HJK komandasının heyətində növbəti matçına çıxıb.
Arena.az xəbər verir ki, 26 yaşlı futbolçunun komandası Avropa Konfrans Liqasının Liqa mərhələsinin sonuncu – 6-cı turu çərçivəsində “Betis”lə üz-üzə gəlib.
Helsinki təmsilçisi rəqib meydanında baş tutan bu oyunda İspaniya klubuna məğlub olub – 0:1.
Ozan bu görüşə start heyətdə başlayıb və 64-cü dəqiqədə əvəzlənib.
HJK 6 oyuna topladığı 4 xalla Konfrans Liqasının Liqa mərhələsini 30-cu sırada başa vurub. Finlandiya təmsilçisi bu nəticədən sonra Konfrans Liqası ilə vidalaşmalı olub.
Əvvəlki iki mövsümü Niderlandın “Eyndhoven” klubunda keçirmiş Ozan Can Kökçü 2024-cü il iyulun 31-də HJK ilə 2,5 illik müqaviləyə imza atıb. O, bu klubun heyətində 19 oyun keçirib, 1 məhsuldar ötürmə edib.
Ozan daha öncə Niderlandda “Eyndhoven”, “Valveyk” və “Telstar”ın, Türkiyədə “Bursaspor” və “Girəsunspor”un, Azərbaycanda “Sabah”ın da uğurları üçün çalışıb. Azərbaycanın U-20 və U-21 yığmalarının formasını geyinmiş futbolçu 2022-ci ildən əsas millimizə dəvət alır. O, Azərbaycan milli komandasının heyətində 11 oyuna çıxıb, 2 məhsuldar ötürmə müəllifi olub.
