Futbol üzrə Azərbaycan millisinin yarımmüdafiəçisi Ozan Can Kökçü Finlandiyanın HJK komandasının heyətində növbəti matçına çıxıb.
Arena.az xəbər verir ki, 26 yaşlı futbolçunun komandası bu gün Finlandiya Liqa Kubokunun qrup mərhələsinin 5-ci turu çərçivəsində KTP ilə üz-üzə gəlib.
Helsinki təmsilçisi səfərdə baş tutan bu oyunda asan qələbəyə sevinib – 4:0.
Ozan bu görüşün 72-ci dəqiqəsində meydana buraxılıb. Komandasının sonuncu qolunu da məhz Kökçü vurub. O, 75-ci dəqiqədə fərqlənib.
Qeyd edək ki, bu, Ozanın HJK-da ilk qoludur.
HJK 5 oyuna topladığı 12 xalla Liqa Kubokunun qrup mərhələsini birinci pillədə başa vurub və növbəti mərhələyə vəsiqə qazanıb. Eyni xalla qrup ikincisi olan “İnter Turku” da pley-offa yüksəlib.
Xatırladaq ki, Ozan Can Kökçü Finlandiya klubuna 2024-cü il iyulun 31-də cəlb olunub. O, həmin vaxt HJK ilə 2,5 illik müqaviləyə imza atıb. Millimizin üzvü bu klubun heyətində 22 oyun keçirib, 1 qol vurub, 2 məhsuldar ötürmə edib.
Ozan daha öncə Niderlandda “Eyndhoven”, “Valveyk” və “Telstar”ın, Türkiyədə “Bursaspor” və “Girəsunspor”un, Azərbaycanda “Sabah”ın da uğurları üçün çalışıb. Azərbaycanın U-20 və U-21 yığmalarının formasını geyinmiş futbolçu 2022-ci ildən əsas millimizə dəvət alır. O, Azərbaycan milli komandasının heyətində 11 oyuna çıxıb, 2 məhsuldar ötürmə müəllifi olub.
